Një ngjarje që i ngjan historisë së Jusufit

Ibnul-Kajjimi, Allahu e mëshiroftë, ka thënë se transmetohet nga Husejn ibën AbduRrahmani, i cili ka thënë:

“Më ka arritur lajmi se një djalosh nga banorët e Medinës falej në të gjitha namazet me Umer ibnl-Hattabin, radijAllahu anhu. Kur mungonte, ai interesohej për të.

Një grua nga banorët e Medinës u dashurua pas tij dhe ia tregoi këtë disa grave që i njihte. Njëra prej tyre i tha: Unë do të gjej një mënyrë që ta fus tek ti!

Ajo u ul pranë rrugës ku kalonte ai. Kur ai kaloi pranë saj, ajo i tha: Unë jam një grua e moshuar dhe kam një dele të cilën nuk mund ta mjel vetë. A do të hyje brenda që të ma mjelësh?

Ai hyri brenda, por nuk pa asnjë dele.

Ajo i tha: Ulu derisa të ta sjell.

Kur papritur gruaja iu shfaq para tij. Kur e pa këtë, ai shkoi te një skaj i shtëpisë dhe u ul aty. Ajo filloi ta joshte për të kryer marrëdhënie me të, por ai refuzoi dhe i tha: ‘Ki frikë Allahun, o grua!’

Ajo vazhdonte të këmbëngulte dhe nuk i kushtonte rëndësi fjalëve të tij. Kur ai vazhdoi ta refuzonte, ajo filloi të bërtiste. Njerëzit erdhën dhe ajo u tha:

Ky hyri tek unë duke më kërkuar të kryente marrëdhënie me mua!

Ata u hodhën mbi të, filluan ta rrihnin dhe e lidhën.

Kur Umeri fali namazin e sabahut dhe ndërsa ishte aty, e sollën djaloshin të lidhur. Kur e pa, Umeri u lut dhe tha:

“O Allah, mos ma zhgënje besimin që kam tek ai.”

Pastaj tha: Çfarë ka ndodhur?

Ata thanë: Një grua kërkoi ndihmë gjatë natës. Shkuam dhe e gjetëm këtë djalosh tek ajo, prandaj e rrahëm dhe e lidhëm.

Umeri i tha djaloshit: Më trego të vërtetën.

Ai tha: O prijës i besimtarëve, ndodhi kështu e kështu.

Umeri tha: A e njeh gruan e moshuar?

Ai tha: Po. Nëse e shoh, do ta njoh.

Atëherë Umeri dërgoi të thërrisnin gratë që banonin pranë saj dhe gratë e moshuara të tyre. Ato u sollën aty. Kur kaloi kjo grua e moshuar, ai tha:

Kjo është ajo, o prijës i besimtarëve.

Umeri e ngriti kamxhikun kundër saj dhe i tha: Më trego të vërtetën.

Ajo i tregoi ngjarjen ashtu siç ia kishte treguar djaloshi.

Atëherë Umeri, radijAllahu anhu, tha:

Falënderimi i takon Allahut që ka bërë të ketë mes nesh dikë të ngjashëm me Jusufin, alejhis-selam.”

(Reudatul-Muhibbin, f. 459)

Përktheu: Besim Gjelaj