Si të dallohet gjaku i menstruacioneve nga gjaku i istihadës

Shejh Ibën Uthejmini, Allahu e mëshiroftë, ka thënë:

Dallimi ndërmjet gjakut të menstruacioneve dhe gjakut të istihadës (gjakderdhja e çrregullt jashtë periudhës së menstruacioneve) bëhet përmes katër shenjave:

E para: Ngjyra.

Gjaku i menstruacioneve është i zi, ndërsa gjaku i istihadës është i kuq.

E dyta: Trashësia.

Gjaku i menstruacioneve është i trashë dhe i dendur, ndërsa gjaku i istihadës është i hollë.

E treta: Era.

Gjaku i menstruacioneve ka erë të rëndë dhe të pakëndshme, ndërsa gjaku i istihadës nuk ka erë të tillë, sepse është gjak i një ene të zakonshme të gjakut.

E katërta: Mpiksja.

Gjaku i menstruacioneve nuk mpikset pasi të dalë, sepse ai është mpiksur tashmë në mitër, pastaj është shpërbërë dhe ka rrjedhur; kështu, nuk kthehet përsëri në gjendjen e mpiksjes. Ndërsa gjaku i istihadës mpikset, sepse është gjak që rrjedh nga një enë gjaku.

Kështu kanë thënë disa prej mjekëve bashkëkohorë. Pejgamberi salAllahu alejhi ue selem gjithashtu ka aluduar në këtë me fjalën e tij:

“Ai është gjak që rrjedh nga një enë gjaku.”

Dhe dihet se gjaku që del nga enët e gjakut mpikset.

(Sher’hul-Mumti‘, 1/488)

Përktheu: Besim Gjelaj