Përhapja e kolonizimit përmes tyrbeve (teqeve)!

Përhapja e kolonizimit përmes tyrbeve (teqeve)!

Shejh El-Beshir El-Ibrahimij, ka thënë:

“Ec sa të duash në çdo kohë dhe përgjatë të gjitha rrugëve të komunikacionit, do të shohësh kupola të bardha të shpërndara nëpër kthesa, kodra dhe majat e maleve. Nëse pyet për to, do të gjesh që një numër i vogël i tyre u atribuohet ndonjë paraardhësi të njohur të fiseve, një pjesë tjetër e vogël është e panjohur, ndërsa shumica e tyre i referohen shejh Abdul Kadir el-Xhejlanit.

Por, nëse pyet të vërtetën, ajo do të të përgjigjet se shumicën e këtyre kupolave i ndërtuan kolonizatorët evropianë në skajet e fermave të tyre të gjera, pasi kuptuan sa të dhënë ishin këta njerëz pas kupolave, sa i respektonin ato dhe sa e madhëronin shejh Abdul Kadir el-Xhejlanin. Ata e bënë këtë për të mbrojtur fermat e tyre nga vjedhjet dhe dëmtimet.

Çdo kolonizator që ndërtonte një ose dy kupola të tilla, e siguronte fermën e tij nga vjedhjet dhe nuk kishte më nevojë për rojtarë apo për shpenzime sigurie. Pastaj, ua linte këtyre të verbërve – të cilët kishin humbur fenë dhe dynjanë e tyre – që të organizonin çdo vit festime rreth tyre, të shpenzonin shuma të mëdha për zotime dhe dhurata, si dhe të kujdeseshin për mirëmbajtjen dhe zbukurimin e tyre.

Madje, kolonizatori mund të merrte pjesë me ta në festimet dhe therjen e kurbaneve, në mënyrë që ata të thoshin për të: ‘Ky është një njeri që i do evliatë dhe u shërben atyre!’ Derisa, pasi ua kishin mbjellë këtë besim në zemrat e tyre, ai u kthente shpinën dhe u merrte tokat, duke i dëbuar nga ato. Me këtë metodë djallëzore, kolonizatorët arritën të zaptonin ato toka pjellore dhe t’i shndërronin në kopshte. Kjo ishte një prej metodave të tjera të shumta që përdorën për t’ua rrëmbyer tokën banorëve të saj.”

(Kitabul-Athar el-Imam Muhamed elBeshir el-Ibrahimij 3/321)
Përktheu: Besim Gjelaj